Kreppuvöfflur

Heita reyndar „ hversdagsvöfflur “ en kreppuvöfflur eiga vel við nú

Þetta er ágætis uppskrift af ódýrum, eggjalausum vöfflum, sem kom sér vel á árum áður (í kringum áttatíu ).

Þá var eggjahallæri hér i sveitinni og maður þurfti að gefa köllunum sem voru að keyra í lóðina okkar þegar við vorum að byggja, eitthvað gott með kaffinu. 

Nú svo henta þessar vöfflur líka þeim sem ekki mega borða egg 

 

2 1/2 dl vatn

2 dl mjólk

1/4 tsk salt

3 1/2 dl hveiti

2 tsk lyftiduft

125 gr smjörlíki

Setjið lyftiduftið og saltið saman við hveitið og hellið vökvanum út í, síðast bræddu smjörlíkinu.

Steiktar á venjulegan hátt og borðist helst strax

Áfram með baðið !

Það er helst að frétta af baðinu að það er búið að flísa, fúgurnar verða kláraðar í dag. Baðkarið er komið á sinn stað og sömuleiðis klósettið. Já og nýtt loft.

Ég sé um svona minniháttar viðvik eins og að þrífa og svo skellti ég upp gardínu svo þetta væri ekki eins berskjaldað  

Við brugðum okkur af bæ í gær þ.e til Akureyrar og keyptum blöndunartæki og ofn.

Ég keypti líka ýmislegt sem þarf til smákökubaksturs, það er nefnilega allt svo dýrt hér í búðinni. Alltaf hagsýn húsmóðir

Eftir það fórum við í heimsókn til Guðrúnar og Sigga og var nú heldur gaman að sjá litlu stúlkurnar okkar, en þær stóru eru að spóka sig í París með pabba sínum og hinum afanum og ömmunni og er voða gaman hjá þeim. Þær eru búnar að fara upp í Effelturninn (það er meira en undirrituð þorði að gera á sínum tíma, lofthræðsla úff ) og skoða Louvre safnið og Mónu Lísu að sjálfsögðu .Þær koma heim á föstudaginn og þá verður gaman að heyra ferðasöguna.

Við fengum líka þennan fína mat hjá dótturinni, fylltar kjúklingabringur, steikt ferskt grænmeti, hrísgrjón og paprikuostasósu. Alveg meiriháttar gott

Takk fyrir okkur elskan mín

 

Morgunbæn

Góði Guð,

Það sem af er deginum hef ég gert allt rétt.

Ég hef ekkert slúðrað, ekki misst stjórn á skapi mínu, ekki verið gráðug, geðill, dónaleg, eigingjörn eða lamið neinn.

Ég hef ekki grenjað, blótað eða borðað neitt súkkulaði.

Hinsvegar ætla ég mér að fara fram úr rúminu eftir nokkara mínútur og eftir það vantar mig miklu meiri hjálp !