Mótmælastaða í Mývatnssveit.

 

Við ætlum ekki að hætta mótmælaaðgerðum.

Mótmælafundur verður haldinn í Dimmuborgum laugardaginn 24.jan kl. 15.00.

Verðum annað hvort á Hallarflöt eða bílastæðinu, veður ræður því.

Þema fundarins verður að reisa við fallið Ísland.

Margar hendur vinna létt verk og eru tilbúnar að leggja nýja Íslandi lið.

 

 Gullkálfurinn.

Öllum er frjálst að tjá sig eða halda ræðu, bara láta vita fyrst.

Við höldum áfram að láta raddir okkar heyrast og mætum hress.

Ekki er vitlaust að hafa eitthvað til að bíta í og heitt á brúsa.

Fundurinn endar með íhugun í friði og þögn.

Fyrir Ísland !

Fyrir framtíðina !

 

„ Gömul frétt “

Þetta er ekki í fyrsta skipti sem styr hefur staðið um St. Jósefspítala  eða einhliða ákvarðanir hafa verið teknar um hann. Það stóð til að  draga úr framlögum um 48% árið 1992 og gera verulegar breytingar á rekstri spítalans.  Einhliða ákvörðun  eins og nú, án samráðs við Hafnarfjarðarbæ, eignaraðila að spítalanum á móti ríkinu.  Þessum áformum var mótmælt einróma af bæjarráði. Bandalag kvenna Hafnafirði sendi þáverandi heilbrigðisráðherra Sighvati Björgvinssyni bréf, ályktun fundar þar sem komu fram áhyggjur kvenna vegna breytinga á rekstri spítalans sem hefði þjónað Hafnfirðingum og nágrenni af kostgæfni. Tíundað um gjafir mikilvægra og dýrra tækja og annars frá félagasamtökum og einstaklingum sem sýndu hug íbúa til spítalans. Þá var einnig sagt brýnt að rekið yrði áfram deildarskipt sjúkrahús og það uppbyggingarstarf sem þar væri unnið fengi að dafna. B.K.H. skoraði á ráðherra að draga áform sín um lokun sjúkrahússins til baka.

Ekki var látið staðar numið heldur efnt til undirskriftarsöfnunar sem skilaði yfir tíu þúsund undirskriftum íbúa Hafnarfjarðar, Garðabæjar og Bessastaðahrepps, sem afhentar voru Sighvati Björgvinssyni heilbrigðisráðherra og forseta Alþingis Salóme Þorkelsdóttur.

Já þetta var þá....

Fordæma lokun St. Jósefsspítala

Gleðilegt ár !

„Bara einn kall úti á túni að skjóta upp flugeldum “Harpa María dótturdóttir mín.... sú elsta (13) lýsir áramótunum hér í Mývó þannig. Smá ýkjur hahahaha og við eigum býsna skotglaðan nágranna.

Við áttum ágæt jól, og rjúpurnar voru góðar.

Sungum við messu á jóladag og prestinum varð á í messunni....skellti bara inn sálmi sem ekki var á dagskránni og byrjaði að syngja hann, svo við...sem vorum byrjuð að syngja „Nóttin var sú ágæt ein“ snérum okkar kvæði í kross með hraði yfir í „ Fögur er foldin“. Organistanum var svo mikið um þetta að hann varð að fá sér róandi eftir messu.

Við borðuðum hangikjötið öll saman í gömlu Vogum eins og við erum orðin vön að gera.  Fórum á jólaball með barnabörn og svo var afmæli Kobba þann 29. des.

Engum boðið svo sem en það koma þeir sem koma vilja, ég hef alltaf eitthvað á borðum og spennandi er að sjá hverjir birtast, núna komu m.a Hinrik og Sigga sem hafa ekki komið í mörg ár og var þetta hin ánægjulegasta kvöldstund.

Guðrún Elísabet bauð okkur og Stefáni, Hildu og Júlíu til sín á Akureyri um áramótin sem var indælt og hreindýrið „Rúdólfur“ var snilldar gott hjá henni.

Við færðum okkur svo um set til tengdaforeldra hennar sem búa ofar í bænum með gott útsýni. Það var fárbært að fylgjast með flugeldunum þaðan, þau höfðu nú á orði að þetta væri töluvert minna en í fyrra.

En allt var gott við saman fjölskyldan, eins og okkur líður best sæl og glöð.

Já, og ég var ánægð með áramótaskaupið, ef einhver skildi spyrja.

Megi Guð gefa okkur öllum gott og farsælt ár !